Asturies lleva viviendo un fin de ciclu en dellos sectores que la definieron económicamente dende cuantayá. Pegollos nos que se sofitó’l calter industrial y estractivu del país tán desapaeciendo o col pieslle como amenaza cercana. La situación actual lleva tamién a poner en peligru real un modelu públicu de protección social que n’Asturies tien importancia especial poles sos característiques demográfiques. Los asturianos y asturianes carecemos una serie de problemes estructurales que torguen el desarrollu y condicionen el futuru de la nuestra tierra: infraestructures comunicatives deficitaries, perda de texíu industrial, deterioru de la sanidá pública, falta de control n’estayes como la ferroviaria o la fluvial —fundamentales nuna orografía como la nuestra—, abandonu poblacional de les zones rurales, perda del talentu mozu por cuenta de la emigración forciada, un turismu depredador, una resquiebra de xéneru inaceptable o una baxada demográfica preocupante. Too eso como consecuencia d’una inoperatividá y dexadez de la clas política qu’alministró estes cuatro décades de réxime autonómicu, que nun tuvo nin tien un proyectu de país, una idea d’Asturies. Per otru llau, la estructura ideolóxica del Estáu español xeneró un conglomeráu d’élites empresariales, polítiques, xudiciales, alministratives y mediátiques con un esquema mental centralista, que tien como consecuencia la perda de recursos económicos y humanos bultables p’aquellos territorios más «periféricos». Una manera d’actuar que contó col preste y la conformidá de les élites (económiques, polítiques, periodístiques, culturales…) asturianes, frutu del so siguidismu y los sos complexos.

Frente a esta situación, creyemos que ye tiempu d’escomenzar a falar ensin mieu y d’una manera desprexuiciada del conceptu de soberaníes, nun sentíu plural y variable, pero con un nucleu central común que ye’l poder de decisión, y vinculao con esto tamién la cercanía y l’empoderamientu social.
A los asturianos y asturianes fainos falta repensanos en clave soberanista: una sociedá como la nuestra, pequeña demográfica y territorialmente, con pocu o nulu pesu políticu nel conxuntu estatal, necesita dotase de ferramientes coles que poder incidir nel so devenir como comunidá humana singular; si quieremos tener viabilidá nel futuru, precisamos la capacidá real de poder intervenir en toos aquellos asuntos que nos afecten. Polo tanto, facemos nuestra la idea de soberaníes: alimentaria (productos de cercanía, distribución llocal, sostenibilidá…), enerxética (planificación de la esplotación de los nuestros recursos acordies coles nuestres necesidaes cola mayor eficiencia), comunicativa (tresporte públicu, rede de cercaníes, conexones esteriores…), financiera (banca pública), industrial (participación pública
asturiana nun sector estratéxicu, llucha contra les desllocalizaciones…), mediática (medios de comunicación públicos fuertes al serviciu de les llingües y cultura del país), cultural (potenciar les escenes artístiques y referentes autóctonos) y política (capacidá de la Xunta Xeneral y del Gobiernu Asturianu pa tomar decisiones concluyentes sobre toos aquellos asuntos qu’afecten al país). Otra manera, Asturies nun puede tar ayena al mayor desafíu mundial qu’encaren la humanidá y el planeta: el cambéu climáticu. Ente otres cuestiones porque somos la comunidá autónoma que más gas d’efectu ivernaderu per cápita emite a l’atmósfera de tol Estáu, frutu del nuestru modelu obsoletu de desenvolvimientu económicu y industrial. Ye urxente, polo tanto, marcanos como prioridá d’acción política dir camín d’un cambéu de modelu, qu’ha ser progresivu pero radical, y qu’ha tener como exes una industria descarbonizada dafechu, infraestructures de tresporte basaes nel ferrocarril y xeneración d’enerxía cien por cien renovable. La mayoría social asturiana tien que sentir que la eco nomía asturiana pa la que trabaya-y devuelve’l so esfuerzu en forma de llibertaes, derechos y bienestar. Poner la economía al serviciu de la xente y non de grandes grupos económicos que, mirando namás polos sos propios intereses, frenen el desarrollu del conxuntu ye fundamental pa que’l nuestru país seya viable económicamente nes décades vinientes.

Un reflexu de la sociedá asturiana, que quier crear un espaciu de participación política col oxetivu de facer surdir un movimientu social de progresu, una izquierda renovada y renovadora.

Esti apueste pola soberanía social pol que naguamos diba tar incompletu ensin un proyectu políticu propiu, qu’axunte voluntaes y sensibilidaes diferentes pero complementaries, que pueda llegar a alcuerdos con otres fuercies estatales pero calteniendo la so independencia orgánica, qu’ufierte un discursu autocentráu y un asturianismu maduru. Somos Asturies ye un reflexu de la sociedá asturiana, con persones de capes sociales y profesionales desemeyaes, de trayectories y ideoloxíes polítiques distintes, procedencies xeográfiques estremaes, sensibilidaes culturales, llingüístiques y nacionales diverses, que quier crear un espaciu de participación política col oxetivu de facer surdir un movimientu social de progresu, una izquierda renovada y renovadora; apostamos por una propuesta inequívocamente asturiana y comprometida socialmente, que pueda texer redes d’enfotu, comunicación y collaboración con otres fuercies polítiques y sectores sociales, cola vista puesta nuna futura respuesta electoral conxunta.

Dirixímonos hacia sociedaes multiétniques, plurinacionales, policulturales, llingüísticamente variaes… Hai que tener en cuenta toos estos factores y facer ver a la sociedá asturiana que la soberanía que propugnamos nun ye otra cosa qu’afondar na democracia, qu’averar el poder a los ciudadanos y ciudadanes con tolo que supón. Naguamos por qu’Asturies seya un territoriu vertebráu, normalizáu cultural y llingüísticamente, con una economía diversificada y presencia harmónica de tolos sectores, una industria verde y tresformadora, un sector agrariu activu y dinámicu, paisaxísticamente sostenible y llibre de contaminación, cohesionáu socialmente, demográficamente equilibráu y ambivalente —urbanu/rural—, respetuosu colos derechos de les persones LGTBIQ+ y igualitariu ente homes y muyeres col feminismu como referente, que nos dexe encarar con esperanza y nes meyores condiciones un tiempu nuevu caracterizáu pola rexeneración. Ye tiempu de facer país en tolos campos: nes comunicaciones, na sanidá, na cultura, na economía, nel mediu ambiente, na industria, nos servicios sociales, nel mediu rural, nel urbanismu… Tenemos qu’afondar na democracia, la xusticia social y l’autogobiernu, y ponelos al serviciu de la sociedá asturiana.